{ POEM } Tuti Mala - Ek Pitaah Ke Dil Se..

Tuti Malaa, Bikhre Moti... Jhulas Gaye Sab Sapne...

Rishte Naate Huye Paraaye.. Jo Kal Tak The Apne..

Ungli Pakad Kar Pair Ko Chalaya.. Ghar Ke Choubare Me..

Jawaan Hoke Saamne Aaya .. Woh Ab Batwaare Me..

Utha Naam Batwaare Ka to.. Sab Kuch Lagaa Hai Batne..

Tuti Malaa, Bikhre Moti... Jhulas Gaye Sab Sapne...

Sambandho Ki Ab Bhudhi Aankhein.. Dekh-Dekh Pathraayi

Khwashio Ke Baago Ki Titliya.. Udne Se Ghabraayi...

Kal Ka Nanha Haath Gaal Par, Lagaa Tamacha Kasne..

Tuti Malaa, Bikhre Moti... Jhulas Gaye Sab Sapne...

Deewaron Par Tang Gaye Rishte..Rishto Par Diwaare..

Jeevan Ka har Pal Huaa Paraya.. Kisko Aaj Pukaare..

Rishton Ki Maili Si Chaadar, Lagi Aaj Hai Phatne..

Tuti Malaa, Bikhre Moti... Jhulas Gaye Sab Sapne...

Har Ghar Me Bas Yahi Samasya..Choukhat Par Khadi Hai..

Jisko Chu Kar Dekha "DIL" Kathanayi Wahi Badi Hai..

Har Dor Mein Padi Ganthe.. Lagaa Kaleja Katne..

Tuti Malaa, Bikhre Moti... Jhulas Gaye Sab Sapne...

Jhulas Gaye Sab Sapne...